બૃહત્પારાશરહોરાશાસ્ત્રમ્ · અધ્યાય 19

અથ આયુર્ભાવફલાધ્યાયઃ

આયુર્ભાવફલં ચાઽથ કથયામિ દ્વિજોત્તમ।
આયુઃસ્થાનાધિપઃ કેન્દ્રે દીર્ઘમાયુઃ પ્રયચ્છતિ

આયુસ્થાનાધિપઃ પાપૈઃ સહ તત્રૈવ સંસ્થિતઃ।
કરોત્યલ્પાયુષં જાતં લગ્નેશોઽપ્યત્ર સંસ્થિતઃ

એવં હિ શનિના ચિન્તા કાર્યા તર્કૈર્વિચક્ષણૈઃ।
કર્માધિપેન ચ તથા ચિન્તનં કાર્યમાયુષઃ

ષષ્ઠે વ્યયેઽપિ ષષ્ઠેશો વ્યયાધીશો રિપૌ વ્યયે।
લગ્નેઽષ્ટમે સ્થિતો વાઽપિ દીર્ઘમાયુઃ પ્રયચ્છતિ

સ્વસ્થાને સ્વાંશકે વાઽપિ મિત્રેશે મિત્રમન્દિરે।
દીર્ઘાયુષં કરોત્યેવ લગ્નેશોઽષ્ટમપઃ પુનઃ

લગ્નાષ્ટમપકર્મેશમન્દાઃ કેન્દ્રત્રિકોણયોઃ।
લાભે વા સંસ્થિતાસ્તદ્વદ્‌ દિશેયુર્દીર્ઘમાયુષમ્‌

એવં બહુવિધા વિદ્વન્નાયુર્યોગાઃ પ્રકીર્તિતાઃ।
એષુ યો બલવાંસ્તસ્યાઽનુસારાદાયુરાદિશેત્‌

અષ્ટમાધિપતૌ કેન્દ્રે લગ્નેશે બલવર્જતે।
વિંશદ્વર્ષાણ્યસૌ જીવેદ્‌ દ્વાત્રિંશત્પરમાયુષમ્‌

રન્ધ્રેશે નીચરાશિસ્થે રન્ધ્રે પાપગ્રહૈર્યુતે।
લગ્નેશે દુર્બલે જન્તુરલ્પાયુર્ભવતિ ધ્રુવમ્‌

રન્ધ્રેશે પાપસંયુક્તે રન્ધ્રે પાપગ્રહૈર્યુતે।
વ્યયે ક્રૂરગ્રહાક્રાન્તે જાતમાત્રં મૃતિર્ભવેત્‌

કેન્દ્રત્રિકોણગાઃ પાપાઃ શુભાઃ ષષ્ઠાષ્ટગા યદિ।
લગ્ને નીચસ્થરન્ધ્રેશો જાતઃ સદ્યો મૃતો ભવેત્‌

પઞ્ચમે પાપસંયુક્તે રન્ધ્રેશે પાપસંયુતે।
રન્ધ્રે પાપગ્રહૈર્યુક્તે સ્વલ્પમાયુઃ પ્રજાયતે

રન્ધ્રેશે રન્ધ્રરાશિસ્થે ચન્દ્રે પાપસમન્વિતે।
શુભદૃષ્ટિવિહીને ચ માસાન્તે ચ મૃતિર્ભવેત્‌

લગ્નેશે સ્વોચ્ચરાશિસ્થે ચન્દ્રે લાભસમન્વિતે।
રન્ધ્રસ્થાનગતે જીવે દીર્ઘમાયુર્ન સંશયઃ

લગ્નેશોઽતિબલી દૃષ્ટઃ કેન્દ્રસંસ્થૈઃ શુભગ્રહૈઃ।
ધનૈઃ સર્વગુણૈઃ સાર્ધં દીર્ઘમાયુઃ પ્રયચ્છતિ