અથર્વવેદ · અધ્યાય 5.8

વૈકઙ્કતેનેધ્મેન દેવેભ્ય આજ્યં વહ ।
અગ્ને તામિહ માદય સર્વ આ યન્તુ મે હવમ્

ઇન્દ્રા યાહિ મે હવમિદં કરિષ્યામિ તચ્છૃણુ ।
ઇમ ઐન્દ્રા અતિસરા આકૂતિં સં નમન્તુ મે ।
તેભિઃ શકેમ વીર્યં જાતવેદસ્તનૂવશિન્

યદસાવમુતો દેવા અદેવઃ સંશ્ચિકીર્ષતિ ।
મા તસ્યાગ્નિર્હવ્યં વાક્ષીદ્ધવં દેવા અસ્ય મોપ ગુર્મમૈવ હવમેતન

અતિ ધાવતાતિસરા ઇન્દ્રસ્ય વચસા હત ।
અવિં વૃક ઇવ મથ્નીત સ વો જીવન્ મા મોચિ પ્રાણમસ્યાપિ નહ્યત

યમમી પુરોદધિરે બ્રહ્માણમપભૂતયે ।
ઇન્દ્ર સ તે અધસ્પદં તં પ્રત્યસ્યામિ મૃત્યવે

યદિ પ્રેયુર્દેવપુરા બ્રહ્મ વર્માણિ ચક્રિરે ।
તનૂપાનં પરિપાણં કૃણ્વાના યદુપોચિરે સર્વં તદરસં કૃધિ

યાન્ અસાવતિસરાંશ્ચકાર કૃણવચ્ચ યાન્ ।
ત્વં તાન્ ઇન્દ્ર વૃત્રહન્ પ્રતીચઃ પુનરા કૃધિ યથામું તૃણહાં જનમ્

યથેન્દ્ર ઉદ્વાચનં લબ્ધ્વા ચક્રે અધસ્પદમ્ ।
કૃણ્વેઽહમધરાન્ તથા અમૂઞ્છશ્વતીભ્યઃ સમાભ્યઃ

અત્રૈનાન્ ઇન્દ્ર વૃત્રહન્ન્ ઉગ્રો મર્મણિ વિધ્ય ।
અત્રૈવૈનાન્ અભિ તિષ્ઠેન્દ્ર મેદ્યહં તવ ।
અનુ ત્વેન્દ્રા રભામહે સ્યામ સુમતૌ તવ