અથર્વવેદ · અધ્યાય 5.25

પર્વતાદ્દિવો યોનેરઙ્ગાદઙ્ગાત્સમાભૃતમ્ ।
શેપો ગર્ભસ્ય રેતોધાઃ સરૌ પર્ણમિવા દધત્

યથેયં પૃથિવી મહી ભૂતાનાં ગર્ભમાદધે ।
એવા દધામિ તે ગર્ભં તસ્મૈ ત્વામવસે હુવે

ગર્ભં ધેહિ સિનીવાલિ ગર્ભં ધેહિ સરસ્વતિ ।
ગર્ભં તે અશ્વિનોભા ધત્તાં પુષ્કરસ્રજા

ગર્ભં તે મિત્રાવરુણૌ ગર્ભં દેવો બૃહસ્પતિઃ ।
ગર્ભં ત ઇન્દ્રશ્ચાગ્નિશ્ચ ગર્ભં ધાતા દધાતુ તે

વિષ્ણુર્યોનિં કલ્પયતુ ત્વષ્ટા રૂપાણિ પિંશતુ ।
આ સિઞ્ચતુ પ્રજાપતિર્ધાતા ગર્ભં દધાતુ તે

યદ્વેદ રાજા વરુણો યદ્વા દેવી સરસ્વતી ।
યદિન્દ્રો વૃત્રહા વેદ તદ્ગર્ભકરણં પિબ

ગર્ભો અસ્યોષધીનાં ગર્ભો વનસ્પતીનામ્ ।
ગર્ભો વિશ્વસ્ય ભૂતસ્ય સો અગ્ને ગર્ભમેહ ધાઃ

અધિ સ્કન્દ વીરયસ્વ ગર્ભમા ધેહિ યોન્યામ્ ।
વૃષાસિ વૃષ્ણ્યાવન્ પ્રજાયૈ ત્વા નયામસિ

વિ જિહીષ્વ બાર્હત્સામે ગર્ભસ્તે યોનિમા શયામ્ ।
અદુષ્ટે દેવાઃ પુત્રં સોમપા ઉભયાવિનમ્

ધાતઃ શ્રેષ્ઠેન રૂપેણાસ્યા નાર્યા ગવીન્યોઃ ।
પુમાંસં પુત્રમા ધેહિ દશમે માસિ સૂતવે

ત્વષ્ટઃ શ્રેષ્ઠેન રૂપેણાસ્યા નાર્યા ગવીન્યોઃ ।
પુમાંસં પુત્રમા ધેહિ દશમે માસિ સૂતવે

સવિતઃ શ્રેષ્ઠેન રૂપેણાસ્યા નાર્યા ગવીન્યોઃ ।
પુમાંસં પુત્રમા ધેહિ દશમે માસિ સૂતવે

પ્રજાપતે શ્રેષ્ઠેન રૂપેણાસ્યા નાર્યા ગવીન્યોઃ ।
પુમાંસં પુત્રમા ધેહિ દશમે માસિ સૂતવે