અથર્વવેદ · અધ્યાય 4.2

ય આત્મદા બલદા યસ્ય વિશ્વ ઉપાસતે પ્રશિષં યસ્ય દેવાઃ ।
યોઽસ્યેશે દ્વિપદો યશ્ચતુષ્પદઃ કસ્મૈ દેવાય હવિષા વિધેમ

યઃ પ્રાણતો નિમિષતો મહિત્વૈકો રાજા જગતો બભૂવ ।
યસ્ય છાયામૃતં યસ્ય મૃત્યુઃ કસ્મૈ દેવાય હવિષા વિધેમ

યં ક્રન્દસી અવતશ્ચસ્કભાને ભિયસાને રોદસી અહ્વયેથામ્ ।
યસ્યાસૌ પન્થા રજસો વિમાનઃ કસ્મૈ દેવાય હવિષા વિધેમ

યસ્ય દ્યૌરુર્વી પૃથિવી ચ મહી યસ્યાદ ઉર્વન્તરિક્ષમ્ ।
યસ્યાસૌ સૂરો વિતતો મહિત્વા કસ્મૈ દેવાય હવિષા વિધેમ

યસ્ય વિશ્વે હિમવન્તો મહિત્વા સમુદ્રે યસ્ય રસામિદાહુઃ ।
ઇમાશ્ચ પ્રદિશો યસ્ય બાહૂ કસ્મૈ દેવાય હવિષા વિધેમ

આપો અગ્રે વિશ્વમાવન્ ગર્ભં દધાના અમૃતા ઋતજ્ઞાઃ ।
યાસુ દેવીષ્વધિ દેવ આસીત્કસ્મૈ દેવાય હવિષા વિધેમ

હિરણ્યગર્ભઃ સમવર્તતાગ્રે ભૂતસ્ય જાતઃ પતિરેક આસીત્।
સ દાધાર પૃથિવીમુત દ્યાં કસ્મૈ દેવાય હવિષા વિધેમ

આપો વત્સં જનયન્તીર્ગર્ભમગ્રે સમૈરયન્ ।
તસ્યોત જાયમાનસ્યોલ્બ આસીદ્ધિરણ્યયઃ કસ્મૈ દેવાય હવિષા વિધેમ