અથર્વવેદ · અધ્યાય 15.6

સ ધ્રુવાં દિશમનુ વ્યચલત્।
તં ભૂમિશ્ચાગ્નિશ્ચૌષધયશ્ચ વનસ્પતયશ્ચ વાનસ્પત્યાશ્ચ વીરુધશ્ચાનુવ્યચલન્ ।
ભૂમેશ્ચ વૈ સોઽગ્નેશ્ચૌષધીનાં ચ વનસ્પતીનાં ચ વાનસ્પત્યાનાં ચ વીરુધાં ચ પ્રિયં ધામ ભવતિ ય એવં વેદ
સ ઊર્ધ્વાં દિશમનુ વ્યચલત્।
તમૃતં ચ સત્યં ચ સૂર્યશ્ચ ચન્દ્રશ્ચ નક્ષત્રાણિ ચાનુવ્યચલન્ ।
ઋતસ્ય ચ વૈ સ સત્યસ્ય ચ સૂર્યસ્ય ચ ચન્દ્રસ્ય ચ નક્ષત્રાણાં ચ પ્રિયં ધામ ભવતિ ય એવં વેદ
સ ઉત્તમાં દિશમનુ વ્યચલત્।
તમૃચશ્ચ સામાનિ ચ યજૂંષિ ચ બ્રહ્મ ચાનુવ્યચલન્ ।
ઋચાં ચ વૈ સ સામ્નાં ચ યજુષાં ચ બ્રહ્મણશ્ચ પ્રિયં ધામ ભવતિ ય એવં વેદ ॥૩॥
સ બૃહતીં દિશમનુ વ્યચલત્।
તમિતિહાસશ્ચ પુરાણં ચ ગાથાશ્ચ નારાશંસીશ્ચાનુવ્યચલન્ ।
ઇતિહાસસ્ય ચ વૈ સ પુરાણસ્ય ચ ગાથાનાં ચ નારાશંસીનાં ચ પ્રિયં ધામ ભવતિ ય એવં વેદ॥
સ પરમાં દિશમનુ વ્યચલત્।
તમાહવનીયશ્ચ ગાર્હપત્યશ્ચ દક્ષિણાગ્નિશ્ચ યજ્ઞશ્ચ યજમાનશ્ચ પશવશ્ચાનુવ્યચલન્॥
આહવનીયસ્ય ચ વૈ સ ગાર્હપત્યસ્ય ચ દક્ષિણાગ્નેશ્ચ યજ્ઞસ્ય ચ યજમાનસ્ય ચ પશૂનાં ચ પ્રિયં ધામ ભવતિ ય એવં વેદ
સોઽનાદિષ્ટાં દિશમનુ વ્યચલત્।
તમૃતવશ્ચાર્તવાશ્ચ લોકાશ્ચ લૌક્યાશ્ચ માસાશ્ચાર્ધમાસાશ્ચાહોરાત્રે ચાનુવ્યચલન્॥
ઋતૂનાં ચ વૈ સ આર્તવાનાં ચ લોકાનાં ચ લૌક્યાનાં ચ માસાનાં ચાર્ધમાસાનાં ચાહોરાત્રયોશ્ચ પ્રિયં ધામ ભવતિ ય એવં વેદ
સોઽનાવૃત્તાં દિશમનુ વ્યચલત્તતો નાવર્ત્સ્યન્ન્ અમન્યત ।
તં દિતિશ્ચાદિતિશ્ચેડા ચેન્દ્રાણી ચાનુવ્યચલન્ ।
દિતેશ્ચ વૈ સોઽદિતેશ્ચેડાયાશ્ચેન્દ્રાણ્યાશ્ચ પ્રિયં ધામ ભવતિ ય એવં વેદ
સ દિશોઽનુ વ્યચલત્તં વિરાડનુ વ્યચલત્સર્વે ચ દેવાઃ સર્વાશ્ચ દેવતાઃ ।
વિરાજશ્ચ વૈ સ સર્વેષાં ચ દેવાનાં સર્વાસાં ચ દેવતાનાં પ્રિયં ધામ ભવતિ ય એવં વેદ॥
સ સર્વાન્ અન્તર્દેશાન્ અનુ વ્યચલત્।
તં પ્રજાપતિશ્ચ પરમેષ્ઠી ચ પિતા ચ પિતામહશ્ચાનુવ્યચલન્ ।
પ્રજાપતેશ્ચ વૈ સ પરમેષ્ઠિનશ્ચ પિતુશ્ચ પિતામહસ્ય ચ પ્રિયં ધામ ભવતિ ય એવં વેદ॥