અર્ગલાસ્તોત્રં · અધ્યાય 1

અથાર્ગલાસ્તોત્રમ્
ૐ અસ્ય શ્રીઅર્ગલાસ્તોત્રમન્ત્રસ્ય વિષ્ણુઋષિઃ અનુષ્ટુપ છન્દઃ શ્રીમહાલક્ષ્મીર્દેવતા શ્રીજગદમ્બાપ્રીતયે સપ્તશતીપાઠાઙ્ગત્વેન જપે વિનિયોગઃ ॥
ૐ નમશ્ચણ્ડિકાયૈ ॥
માર્કણ્ડેય ઉવાચ
ૐ જયન્તી મઙ્ગલા કાલી ભદ્રકાલી કપાલિની ।
દુર્ગા ક્ષમા શિવા ધાત્રી સ્વાહા સ્વધા નમોઽસ્તુતે

જય ત્વં દેવિ ચામુણ્ડે જય ભૂતાર્તિહારિણિ ।
જય સર્વગતે દેવિ કાલરાત્રિ નમોઽસ્તુતે

મધુકૈટભવિદ્રાવિવિધાતૃવરદે નમઃ ।
રુપં દેહિ જયં દેહિ યશો દેહિ દ્વિષો જહિ

મહિષાસુરનિર્ણાશિ ભક્તાનાં સુખદે નમઃ ।
રુપં દેહિ જયં દેહિ યશો દેહિ દ્વિષો જહિ

રક્તબીજવધે દેવિ ચણ્ડમુણ્ડવિનાશિનિ ।
રુપં દેહિ જયં દેહિ યશો દેહિ દ્વિષો જહિ

શુમ્ભસ્યૈવ નિશુમ્ભસ્ય ધૂમ્રાક્ષસ્ય ચ મર્દિનિ ।
રુપં દેહિ જયં દેહિ યશો દેહિ દ્વિષો જહિ

વન્દિતાઙઘ્રિયુગે દેવિ સર્વસૌભાગ્યદાયિનિ ।
રુપં દેહિ જયં દેહિ યશો દેહિ દ્વિષો જહિ

ચિન્ત્યરુપચરિતે સર્વશત્રુવિનાશિનિ ।
રુપં દેહિ જયં દેહિ યશો દેહિ દ્વિષો જહિ

નતેભ્યઃ સર્વદા ભક્ત્યા ચણ્ડિકે દુરિતાષહે ।
રુપં દેહિ જયં દેહિ યશો દેહિ દ્વિષો જહિ

સ્તુવદભ્યો ભક્તિપૂર્વં ત્વાં ચણ્ડિકે વ્યાધિનાશિનિ ।
રુપં દેહિ જયં દેહિ યશો દેહિ દ્વિષો જહિ

ચણ્ડિકે સતતં યે ત્વામર્ચયન્તીહ ભક્તિતઃ ।
રુપં દેહિ જયં દેહિ યશો દેહિ દ્વિષો જહિ

દેહિ સૌભાગ્યંમારોગ્યં દેહિ મે પરમં સુખમ્ ।
રુપં દેહિ જયં દેહિ યશો દેહિ દ્વિષો જહિ

વિધેહિ દ્વિષતાં નાશં વિધેહિ બલમુચ્ચકૈઃ ।
રુપં દેહિ જયં દેહિ યશો દેહિ દ્વિષો જહિ

વિધેહિ દેવિ કલ્યાણં વિધેહિ પરમાં શ્રિયમ્ ।
રુપં દેહિ જયં દેહિ યશો દેહિ દ્વિષો જહિ

સુરાસુરશિરોરત્નનિઘૃષ્ટચરણેઽમ્બિકે ।
રુપં દેહિ જયં દેહિ યશો દેહિ દ્વિષો જહિ

વિદ્યાવન્તં યશસ્વન્તં લક્ષ્મીવન્તં જનં કુરુ ।
રુપં દેહિ જયં દેહિ યશો દેહિ દ્વિષો જહિ

પ્રચણ્ડદૈત્યદર્પઘ્ને ચણ્ડિકે પ્રણતાય મે ।
રુપં દેહિ જયં દેહિ યશો દેહિ દ્વિષો જહિ

ચતુર્ભુજે ચતુર્વક્ત્રસંસ્તુતે પરમેશ્વરિ ।
રુપં દેહિ જયં દેહિ યશો દેહિ દ્વિષો જહિ

કૃષ્ણેન સંસ્તુતે દેવિ શશ્વદ્ભક્ત્યા સદામ્બિકે ।
રુપં દેહિ જયં દેહિ યશો દેહિ દ્વિષો જહિ

હિમાચલસુતાનાથસંસ્તુતે પરમેશ્વરિ ।
રુપં દેહિ જયં દેહિ યશો દેહિ દ્વિષો જહિ

ઇન્દ્રાણીપતિસદ્ભાવપૂજિતે પરમેશ્વરિ ।
રુપં દેહિ જયં દેહિ યશો દેહિ દ્વિષો જહિ

દેવિ પ્રચણ્ડદોર્દણ્ડદૈત્યદર્પવિનાશિનિ ।
રુપં દેહિ જયં દેહિ યશો દેહિ દ્વિષો જહિ

દેવિ ભક્તજનોદ્દામદત્તાનન્દોદયેઽમ્બિકે ।
રુપં દેહિ જયં દેહિ યશો દેહિ દ્વિષો જહિ

પત્નીં મનોરમાં દેહિ મનોવૃત્તાનુસારિણીમ્ ।
તારિણીં દુર્ગસંસારસાગરસ્ય કુલોદ્ભવામ્

ઇદં સ્તોત્રં પઠિત્વા તુ મહાસ્તોત્રં પઠેન્નરઃ ।
સ તુ સપ્તશતીસંખ્યાવરમાપ્નોતિ સમ્પદામ્