અર્ધનારીશ્વરસ્તોત્રમ્ · અધ્યાય 1

॥ અર્ધનારીશ્વરસ્તોત્રમ્ ॥
ચામ્પેયગૌરાર્ધશરીરકાયૈ કર્પૂરગૌરાર્ધશરીરકાય।
ધમ્મિલ્લકાયૈ ચ જટાધરાય નમઃ શિવાયૈ ચ નમઃ શિવાય

કસ્તૂરિકાકુઙ્કુમચર્ચિતાયૈ ચિતારજઃપુઞ્જવિચર્ચિતાય।
કૃતસ્મરાયૈ વિકૃતસ્મરાય નમઃ શિવાયૈ ચ નમઃ શિવાય

ઝણત્ક્વણત્કઙ્કણનૂપુરાયૈ પાદાબ્જરાજત્ફણિનૂપુરાય।
હેમાઙ્ગદાયૈ ભુજગાઙ્ગદાય નમઃ શિવાયૈ ચ નમઃ શિવાય

વિશાલનીલોત્પલલોચનાયૈ વિકાસિપઙ્કેરુહલોચનાય।
સમેક્ષણાયૈ વિષમેક્ષણાય નમઃ શિવાયૈ ચ નમઃ શિવાય

મન્દારમાલાકલિતાલકાયૈ કપાલમાલાઙ્કિતકન્ધરાય।
દિવ્યામ્બરાયૈ ચ દિગમ્બરાય નમઃ શિવાયૈ ચ નમઃ શિવાય

અમ્ભોધરશ્યામલકુન્તલાયૈ તડિત્પ્રભાતામ્રજટાધરાય।
નિરીશ્વરાયૈ નિખિલેશ્વરાય નમઃ શિવાયૈ ચ નમઃ શિવાય

પ્રપઞ્ચસૃષ્ટ્યુન્મુખલાસ્યકાયૈ સમસ્તસંહારકતાણ્ડવાય।
જગજ્જનન્યૈ જગદેકપિત્રે નમઃ શિવાયૈ ચ નમઃ શિવાય

પ્રદીપ્તરત્નોજ્જ્વલકુણ્ડલાયૈ સ્ફુરન્મહાપન્નગભૂષણાય।
શિવાન્વિતાયૈ ચ શિવાન્વિતાય નમઃ શિવાયૈ ચ નમઃ શિવાય

એતત્પઠેદષ્ટકમિષ્ટદં યો ભક્ત્યા સ માન્યો ભુવિ દીર્ઘજીવી।
પ્રાપ્નોતિ સૌભાગ્યમનન્તકાલં ભૂયાત્સદા તસ્ય સમસ્તસિદ્ધિઃ

॥ ઇતિ શ્રીમત્પરમહંસપરિવ્રાજકાચાર્યસ્ય શ્રીગોવિન્દભગવત્પૂજ્યપાદશિષ્યસ્ય શ્રીમચ્છંકરભગવતઃ કૃતૌ અર્ધનારીશ્વરસ્તોત્રમ્ સમ્પૂર્ણમ્ ॥