અનુત્તરાષ્ટિકા · ભાગ 11

સંક્રામો ઽત્ર ન ભાવના ન ચ કથાયુક્તિર્ ન ચર્ચા ન ચ ધ્યાનં વા ન ચ ધારણા ન ચ જપાભ્યાસપ્રયાસો ન ચ ।
તત્ કિં નામ સુનિશ્ચિતં વદ પરં સત્યં ચ તચ્છ્રૂયતાં ન ત્યાગી ન પરિગ્રહી ભજ સુખં સર્વં યથાવસ્થિતઃ ॥
સંસારો ઽસ્તિ ન તત્ત્વતસ્ તનુભૃતાં બન્ધસ્ય વાર્તૈવ કા બન્ધો યસ્ય ન જાતુ તસ્ય વિતથા મુક્તસ્ય મુક્તિક્રિયા ।
મિથ્યામોહકૃદ્ એષ રજ્જુભુજગચ્છાયાપિશાચભ્રમો મા કિંચિત્ ત્યજ મા ગૃહાણ વિહર [1] સ્વસ્થો યથાવસ્થિતઃ ॥
પૂજપૂજકપૂજ્યભેદસરણિઃ કેયં કથાનુત્તરે સંક્રામઃ કિલ કસ્ય કેન વિદધે કો વા પ્રવેશક્રમઃ ।
માયેયમ્ ન ચિદદ્વયાત્ પરતયા ભિન્નાપ્ય્ અહો વર્તતે સર્વં સ્વાનુભવસ્વભાવવિમલં ચિન્તાં વૃથા મા કૃથાઃ ॥
આનન્દો ઽત્ર ન વિત્તમધ્યમદવન્ નૈવાઙ્ગનાસઙ્ગવત્ દીપાર્કેન્દુકૃતપ્રભાપ્રકરવન્ નૈવ પ્રકાશોદયઃ ।
હર્ષઃ સંભૃતભેદમુક્તિસુખભૂર્ ભારાવતારોપમઃ સર્વાદ્વૈતપદસ્ય વિસ્મૃતનિધેઃ પ્રાપ્તિઃ પ્રકાશોદયઃ ॥
રાગદ્વેષસુખાસુખોદયલયાહઙ્કારદૈન્યાદયો યે ભાવાઃ પ્રવિભાન્તિ વિશ્વવપુષો ભિન્નસ્વભાવા ન તે ।
વ્યક્તિં પશ્યસિ યસ્ય યસ્ય સહસા તત્તત્તદેકાત્મતાસંવિદ્રૂપમ્ અવેક્ષ્ય કિં ન રમસે તદ્ભાવનાનિર્ભરઃ ॥
પૂર્વાભાવભવક્રિયા હિ સહસા ભાવાઃ સદા ઽસ્મિન્ ભવે મધ્યાકારવિકારસંકરવતાં તેષાં કુતઃ સત્યતા ।
નિઃસત્યે ચપલે પ્રપઞ્ચનિચયે સ્વપ્નભ્રમે પેશલે શઙ્કાતઙ્કકલઙ્કયુક્તિકલનાતીતઃ પ્રબુદ્ધો ભવ ॥
ભાવાનાં ન સમુદ્ભવો ઽસ્તિ સહજસ્ ત્વદ્ભાવિતા ભાન્ત્ય્ અમી નિઃસત્યા અપિ સત્યતામ્ અનુભવભ્રાન્ત્યા ભજન્તિ ક્ષણમ્ ।
ત્વત્સઙ્કલ્પજ એષ વિશ્વમહિમા નાસ્ત્ય્ અસ્ય જન્માન્યતઃ તસ્માત્ ત્વં વિભવેન ભાસિ ભુવનેષ્વ્ એકોપ્ય્ અનેકાત્મકઃ ॥
યત્ સત્યં યદ્ અસત્યમ્ અલ્પબહુલં નિત્યં ન નિત્યં ચ યત્ યન્ માયામલિનં યદ્ આત્મવિમલં ચિદ્દર્પણે રાજતે ।
તત્ સર્વં સ્વવિમર્શસંવિદુદયાદ્ રૂપપ્રકાશાત્મકં જ્ઞાત્વા સ્વાનુભવાધિરૂઢમહિમા વિશ્વેશ્વરત્વં ભજ ॥
॥ ઇતિ શ્રીમદાચાર્યાભિનવગુપ્તપાદૈર્ વિરચિતાનુત્તરાષ્ટિકા સમાપ્તા ॥