અન્નપૂર્ણાસ્તોત્રમ્ · અધ્યાય 1

॥ અન્નપૂર્ણાસ્તોત્રમ્ ॥
નિત્યાનન્દકરી વરાભયકરી સૌન્દર્યરત્નાકરી નિર્ધૂતાખિલઘોરપાવનકરી પ્રત્યક્ષમાહેશ્વરી ।
પ્રાલેયાચલવંશપાવનકરી કાશીપુરાધીશ્વરી ભિક્ષાં દેહિ કૃપાવલમ્બનકરી માતાન્નપૂર્ણેશ્વરી

નાનારત્નવિચિત્રભૂષણકરી હેમામ્બરાડમ્બરી મુક્તાહારવિલમ્બમાનવિલસદ્વક્ષોજકુમ્ભાન્તરી ।
કાશ્મીરાગુરૂવાસિતા રુચિકરી કાશીપુરાધીશ્વરી ભિક્ષાં દેહિ કૃપાવલમ્બનકરી માતાન્નપૂર્ણેશ્વરી

યોગાનન્દકરી રિપુક્ષયકરી ધર્માથનિષ્ઠાકરી ચન્દ્રાર્કાનલભાસમાનલહરી ત્રૈલોક્યરક્ષાકરી ।
સર્વૈશ્વર્યસમસ્તવાંછનકરી કાશીપુરાધીશ્વરી ભિક્ષાં દેહિ કૃપાવલમ્બનકરી માતાન્નપૂર્ણેશ્વરી

કૈલાસાચલકન્દરાલયકરી ગૌરી ઉમાશઙ્કરી કૌમારી નિગમાર્થગોચરકરી ૐકારબીજાક્ષરી ।
મોક્ષવ્દારકપાટપાટનકરી કાશીપુરાધીશ્વરી ભિક્ષાં દેહિ કૃપાવલમ્બનકરી માતાન્નપૂર્ણેશ્વરી

દૃશ્યાદૃશ્યવિભૂતવાહનકરી બ્રમ્હાણ્ડભાણ્ડોદરી લીલાનાટકસૂત્રભેદનકરી વિજ્ઞાનદીપાઙ્કુરી ।
શ્રીવિશ્વેશમનઃપ્રસાદનકરી કાશીપુરાધીશ્વરી ભિક્ષાં દેહિ કૃપાવલમ્બનકરી માતાન્નપૂર્ણેશ્વરી

ઉર્વી સર્વજનેશ્વરી ભગવતી માતાન્નપૂર્ણેશ્વરી વેણીનીલસમાનકુન્તલહરી નિત્યાન્નદાનેશ્વરી ।
સર્વાનન્દકરી સદાશુભકરી કાશીપુરાધીશ્વરી ભિક્ષાં દેહિ કૃપાવલમ્બનકરી માતાન્નપૂર્ણેશ્વરી

આદિક્ષાન્તિસમસ્તવર્ણનકરી શમ્ભોસ્ત્રિભાવાકરી કાશ્મીરાત્રિપુરેશ્વરી ત્રિનયની નિત્યાઙ્કુરા શર્વરી ।
કામાકાઙ્ક્ષકરી જનોદયકરી કાશીપુરાધીશ્વરી ભિક્ષાં દેહિ કૃપાવલમ્બનકરી માતાન્નપૂર્ણેશ્વરી

દેવી સર્વવિચિત્રરત્નરચિતા દાક્ષાયણી સુન્દરી વામા સ્વાદુપયોગધરપ્રિયકરી સૌભાગ્યમાહેશ્વરી ।
ભક્તાભીષ્ટકરી દશાશુભહરી કાશીપુરાધીશ્વરી ભિક્ષાં દેહિ કૃપાવલમ્બનકરી માતાન્નપૂર્ણેશ્વરી

ચન્દ્રાર્કાલયકોટિકોટિસદૃશા ચન્દ્રાંશુબિમ્બાધરી ચન્દ્રાર્કાગ્નિસમાનકુંડલધરી ચન્દ્રાર્કવર્ણેશ્વરી ।
માલાપુસ્તકપાશસાંકુશધરી કાશીપુરાધીશ્વરી ભિક્ષાં દેહિ કૃપાવલમ્બનકરી માતાન્નપૂર્ણેશ્વરી

ક્ષત્રત્રાણકરી મહાઽભયકરી માતા કૃપાસાગરી સાક્ષાન્મોક્ષકરી સદા શિવકરી વિશ્વેશ્વરી શ્રીધરી ।
દક્ષાક્રન્દકરી નિરામયકરી કાશીપુરાધીશ્વરી ભિક્ષાં દેહિ કૃપાવલમ્બનકરી માતાન્નપૂર્ણેશ્વરી

ભગવતિ ભવરોગાત્પીડિતં દુષ્કૃતોત્થાત્ સુતદુહિતૃકલત્રોપદ્રવેણાનુયાતમ્ ।
વિલસદમૃતદૃષ્ટ્યા વીક્ષ્ય વિભ્રાન્તચિત્તં સકલભુવનમાતસ્ત્રાહિ મામોં નમસ્તે

માહેશ્વરીમાશ્રિતકલ્પવલ્લીમહમ્ભવોચ્છેદકરીં ભવાનીંમ્ ।
ક્ષુધાર્તજાયાતનયાદ્યુપેતસ્ત્વામન્નપૂર્ણે શરણં પ્રપદ્યે

દારિદ્ર્યદાવાનલદહ્યમાનં પાહ્યન્નપૂર્ણે ગિરિરાજકન્યે ।
કૃપામ્બુધૌ મજ્જય માં ત્વદીયે ત્વત્પાદપદ્માર્પિતચિત્તવૃત્તિમ્

અન્નપૂર્ણે સદા પૂર્ણે શઙ્કરપ્રાણવલ્લભે ।
જ્ઞાનવૈરાગ્યસિદ્ધ્યર્થં ભિક્ષાં દેહિ ચ પાર્વતિ

માતા ચ પાર્વતી દેવી પિતા દેવો મહેશ્વરઃ ।
બાન્ધવાઃ શિવભક્તાશ્ચ સ્વેદેશો ભુવનત્રયમ્

ઇતિ શ્રીમચ્છંકરાચાર્યવિરચિતમન્નપૂર્ણાસ્તોત્રં સંપૂર્ણમ્ ।
----