અઙ્ગારકસ્તોત્રમ્ · અધ્યાય 1

અસ્ય શ્રી અઙ્ગારકસ્તોત્રસ્ય ।
વિરૂપાઙ્ગિરસ ઋષિઃ ।
અગ્નિર્દેવતા ।
ગાયત્રી છન્દઃ ।
ભૌમપ્રીત્યર્થં જપે વિનિયોગઃ ।
અઙ્ગારકઃ શક્તિધરો લોહિતાઙ્ગો ધરાસુતઃ ।
કુમારો મઙ્ગલો ભૌમો મહાકાયો ધનપ્રદઃ

ઋણહર્તા દૃષ્ટિકર્તા રોગકૃદ્રોગનાશનઃ ।
વિદ્યુત્પ્રભો વ્રણકરઃ કામદો ધનહૃત્ કુજઃ

સામગાનપ્રિયો રક્તવસ્ત્રો રક્તાયતેક્ષણઃ ।
લોહિતો રક્તવર્ણશ્ચ સર્વકર્માવબોધકઃ

રક્તમાલ્યધરો હેમકુણ્ડલી ગ્રહનાયકઃ ।
નામાન્યેતાનિ ભૌમસ્ય યઃ પઠેત્સતતં નરઃ

ઋણં તસ્ય ચ દૌર્ભાગ્યં દારિદ્ર્યં ચ વિનશ્યતિ ।
ધનં પ્રાપ્નોતિ વિપુલં સ્ત્રિયં ચૈવ મનોરમામ્

વંશોદ્દ્યોતકરં પુત્રં લભતે નાત્ર સંશયઃ ।
યોઽર્ચયેદહ્નિ ભૌમસ્ય મઙ્ગલં બહુપુષ્પકૈઃ

સર્વા નશ્યતિ પીડા ચ તસ્ય ગ્રહકૃતા ધ્રુવમ્

॥ ઇતિ શ્રીસ્કન્દપુરાણે અઙ્ગારકસ્તોત્રં સંપૂર્ણમ્ ॥